माघ १९, काठमाडौँ । नेपाल सरकारको स्वास्थ्य बीमा बोर्डले ओपिडी सेवाको वार्षिक सुविधा सीमित गर्ने महत्वपूर्ण निर्णय गरेको छ। अब स्वास्थ्य बीमा गरेका परिवारले एक आर्थिक वर्षमा ओपिडी सेवाबाट अधिकतम २५ हजार रुपैयाँसम्म मात्र उपचार सुविधा पाउने भएका छन्।

बोर्डले व्ययभार बढ्दै गएपछि कार्यक्रमलाई दिगो बनाउन र बिमित नागरिकलाई प्रभावकारी सेवा दिने उद्देश्यले यो कदम चालेको जनाएको छ।
पाँच जनासम्मको परिवार लाई वार्षिक रु. २५,००० सम्मको सुविधा तथा थप सदस्य १ जनाका लागि रु. ५,००० थप सुविधा दिने भएकाे छ । यो व्यवस्था २०८२ फागुन १ गते बाट लागू हुने र साे सीमाभन्दा बढी खर्च भएमा अस्पताल भर्ना, आकस्मिक वा अन्य विशेष सेवाहरूबाट सुविधा लिन सकिने बोर्डले जनाएको छ।
बोर्डका सूचना अधिकारीहरूका अनुसार, विगतमा ओपिडी सेवामा असीमित दाबीले बोर्डको आर्थिक दबाब बढाएको थियो। यो सीमाले कार्यक्रमको स्थिरता कायम राख्दै बिमितलाई आवश्यक सेवा सुनिश्चित गर्ने अपेक्षा गरिएको छ।

स्वास्थ्य बीमा बोर्डले यो निर्णयलाई कार्यान्वयन गर्न विभिन्न शाखा र प्रदेश/जिल्ला कार्यालयहरूलाई पत्राचार गरेको छ। बिमित नागरिकहरूले नजिकको स्वास्थ्य संस्था वा बोर्डको वेबसाइट (hib.gov.np) मार्फत थप जानकारी लिन सक्नेछन्।
यो परिवर्तनले स्वास्थ्य बीमालाई थप व्यवस्थित र दिगो बनाउने दिशामा सकारात्मक कदम मानिएको छ, तर केही बिमितहरूले OPD सुविधा घटेकोमा असन्तुष्टि पनि व्यक्त गरेका छन ।