असार ३०, काठमाडौँ । राष्ट्रपति रामचन्द्र पौडेलले सङ्घीय संसद्बाट पारित आर्थिक वर्ष २०८३/८४ को बजेटसँग सम्बन्धित तीनवटा महत्त्वपूर्ण विधेयक प्रमाणीकरण गर्नुभएको छ।

राष्ट्रपति कार्यालयका अनुसार, संविधानको धारा ११३ को उपधारा (२) बमोजिम राष्ट्रपति पौडेलले मङ्गलबार ती विधेयकहरू प्रमाणीकरण गर्नुभएको हो। प्रमाणीकरण गरिएका विधेयकहरूमा विनियोजन विधेयक, २०८३, राष्ट्र ऋण उठाउने विधेयक, २०८३ र आर्थिक विधेयक, २०८३ रहेका छन्।

यी विधेयकहरू प्रमाणीकरण भएसँगै सरकारलाई आगामी आर्थिक वर्षका लागि विनियोजित बजेट कार्यान्वयन गर्ने कानुनी बाटो खुलेको छ। यससँगै सरकारलाई सार्वजनिक खर्च गर्ने, राजस्व सङ्कलन गर्ने र कानुनी प्रक्रिया पुर्‍याएर ऋण उठाउन औपचारिक अनुमति प्राप्त भएको छ।