कार्तिक २६, काठमाडाैँ । चीनको दक्षिण–पश्चिमी प्रान्त सिचुवानमा हालै मात्र सञ्चालनमा आएको एउटा पुल आंशिक रूपमा ढलेको छ।

माआरकाङ (तिब्बती नाम बारकाम) शहरस्थित ७५८ मिटर लामो होङछी पुल राष्ट्रिय राजमार्गमार्फत चीनको मुटु प्रदेशलाई तिब्बतसँग जोड्छ। स्थानीय प्रशासनका अनुसार सोमबार दिउँसो पुल वरपरका ढलान र सडकमा दरार देखिएपछि प्रहरीले पुल आवागमनका लागि बन्द गरेको थियो।

मंगलबार दिउँसो पहाडको भू–भागमा थप परिवर्तन देखा परेपछि पहिरो गएको र त्यसैको कारण पुलको नजिकको भाग र सडकको माटोको आधार (रोडबेड) समेत भासिँदै पुलको केही भाग ढलेको जनाइएको छ।

सिचुवान रोड एन्ड ब्रिज ग्रुपले निर्माण गरेको यो पुलको काम यसै वर्ष पूरा भएको थियो। पुल ढल्केको क्षण र त्यसपछिका दृश्यहरू चिनियाँ सामाजिक सञ्जालमा भाइरल भएका छन् ।

सिचुवान क्षेत्र भूकम्पीय रूपमा अत्यन्त सक्रिय मानिन्छ। सन् २००८ मा यहीं ७.९ म्याग्निच्युडको शक्तिशाली भूकम्पमा करिब ६९,००० मानिसको मृत्यु भएको थियो।

स्थानीय अधिकारीहरूले घटनाको कारणबारे थप अनुसन्धान सुरु गरेको जनाएका छन्। प्रारम्भिक अनुमानअनुसार लगातारको भू–स्खलनका कारण पुलको आधार कमजोर बनेको हुनसक्ने बताइएको छ।

यो घटना चीनमा हालै बनेका पूर्वाधार परियोजनाहरूको गुणस्तर र जोखिम व्यवस्थापनमाथि पनि प्रश्न उठाउने विषय बनेको छ।