पाैष २०, काठमाडाैं । अमेरिकी राष्ट्रपति डोनाल्ड ट्रम्पले जनवरी ३ मा अमेरिकाले भेनेजुएलामा रातारात सैन्य आक्रमण गरी राष्ट्रपति निकोलस मादुरोलाई पक्राउ गरेर देशबाहिर लगिएको दाबी गरेका छन्। ट्रम्पले सामाजिक सञ्जाल ट्रुथ सोसलमार्फत अमेरिकाले भेनेजुएलाका विभिन्न स्थानमा ठूलो स्तरको कारबाही गरेको र मादुरो तथा उनकी पत्नीलाई नियन्त्रणमा लिइएको बताएका छन्। यो कारबाही अमेरिकी कानुन कार्यान्वयन निकायसँगको समन्वयमा गरिएको र थप विवरण पत्रकार सम्मेलनमार्फत सार्वजनिक गरिने उनले बताएका छन्।

आक्रमणपछि राजधानी काराकाससहित देशका विभिन्न भागमा विस्फोट र हवाई गतिविधि देखिएको थियो। स्थानीय बासिन्दाले आकाशमा उज्यालो झिल्का र त्यसपछि ठूला विस्फोटको आवाज सुनेको बताएका छन्। केही सैन्य आधार आसपासका क्षेत्रमा धुवाँ देखिएको र दक्षिणी काराकासमा विद्युत् आपूर्ति अवरुद्ध भएको जानकारी आएको छ। भेनेजुएला सरकारले राष्ट्रिय आपतकाल घोषणा गर्दै सेना परिचालन गरेको छ।

भेनेजुएलाका रक्षा मन्त्री भ्लादिमिर पाड्रिनोले अमेरिकी सेनाको उपस्थितिलाई कडा शब्दमा निन्दा गर्दै यसले मृत्यु, पीडा र विनाश मात्र ल्याएको बताएका छन्। उनले देशको स्वतन्त्रता र सार्वभौमिकताको रक्षा गर्न जनतालाई एकजुट हुन आह्वान गरेका छन्। भेनेजुएला सरकारले अमेरिकाले देशको विशाल तेल र खनिज स्रोत कब्जा गर्ने उद्देश्यले आक्रमण गरेको आरोप पनि लगाएको छ।

अमेरिकी पक्षले भने मादुरोमाथि लागुऔषध तस्करी, “नार्को–स्टेट” सञ्चालन र चुनाव धाँधलीको आरोप लगाउँदै कारबाही गरिएको जनाएको छ। यस घटनापछि क्युबा र इरानजस्ता भेनेजुएलाका सहयोगी राष्ट्रहरूले अमेरिकी आक्रमणलाई अन्तर्राष्ट्रिय कानुन र राष्ट्रिय सार्वभौमिकताको उल्लङ्घन भन्दै निन्दा गरेका छन्। यस सैन्य हस्तक्षेपले ल्याटिन अमेरिकामा विगतका अमेरिकी आक्रमणहरूको पीडादायी स्मृति फेरि ताजा गराएको छ र क्षेत्रीय अस्थिरता बढ्ने चिन्ता व्यक्त गरिएको छ।