बैशाख ६, काठमाडौं । सामरिक रूपमा महत्त्वपूर्ण ‘स्ट्रेट अफ हर्मुज’ पार गर्ने क्रममा दुईवटा भारतीय व्यापारिक जहाजमाथि इरानी सुरक्षा बलले गोलाबारी गरेपछि भारतले कडा कूटनीतिक आपत्ति जनाएको छ। इराकबाट कच्चा तेल बोकेर मुम्बईतर्फ आउँदै गरेको ‘सनमार हेराल्ड’ र साउदी अरबबाट आइरहेको ‘जग अर्नब’ नामक जहाजलाई इरानी गनबोटहरूले निशाना बनाएका हुन्। घटनामा कुनै मानवीय क्षति नभए पनि इरानी बलको दबाबपछि भारतीय जहाजहरू मार्ग परिवर्तन गर्न बाध्य भएका थिए।
​यस अभूतपूर्व घटनापछि भारतीय विदेश सचिव विक्रम मिस्रीले नयाँ दिल्लीस्थित इरानी राजदूत मोहम्मद फथालीलाई बोलाएर समुद्री सुरक्षाका विषयमा भारतको गम्भीर चिन्ता व्यक्त गर्दै कडा विरोध दर्ता गर्नुभएको छ। इरानले अमेरिकी नाकाबन्दीको विरोधमा हर्मुज जलमार्गमा आफ्नो पूर्ण नियन्त्रण रहने चेतावनी दिइरहेका बेला यो आक्रमण भएको हो। भारतले आफ्ना जहाजहरूको सुरक्षित आवागमन सुनिश्चित गर्न माग गरेपछि इरानी पक्षले यस विषयलाई सकारात्मक रूपमा समाधान गर्ने आश्वासन दिएको छ। हाल सो क्षेत्रमा अझै १३ वटा भारतीय जहाजहरू रहेकाले सुरक्षा सतर्कता उच्च पारिएको छ।