बैशाख ९, काठमाडौं । अमेरिकी राष्ट्रपति डोनाल्ड ट्रम्पले चीनले इरानलाई गोप्य रूपमा सैन्य सहायता उपलब्ध गराएको हुन सक्ने गम्भीर संकेत गर्नुभएको छ। हालै सिएनबिसीसँगको अन्तर्वार्तामा राष्ट्रपति ट्रम्पले अमेरिकाले चीनबाट आएको एउटा शंकास्पद जहाज नियन्त्रणमा लिएको दाबी गर्दै त्यसमा रहेका वस्तुहरू ‘उपहार’ स्वरूप इरानका लागि पठाइएको हुन सक्ने बताउनुभएको छ। उक्त जहाजमा मिसाइल निर्माणमा प्रयोग हुने घातक रसायनहरू रहेको आशंका गरिए पनि ह्वाइट हाउसले यसबारे विस्तृत विवरण सार्वजनिक गरेको छैन। चीनले भने यसलाई विदेशी कन्टेनर जहाज भन्दै अमेरिकी आरोपको खण्डन गरेको छ।
​यसैबीच, राष्ट्रपति ट्रम्पले चिनियाँ राष्ट्रपति सी चिनफिङलाई पत्र लेख्दै इरानलाई हतियार नदिन सचेत गराएको र सीले त्यसको जबाफमा आफूहरूले त्यसो नगरेको दाबी गरेको खुलासा गर्नुभएको छ। तर, अमेरिकी खुफिया निकायहरूले चीनबाट विमान खसाल्ने रकेट र एयर डिफेन्स प्रणाली इरान जान लागेको सूचना दिएका थिए। अर्कोतर्फ, फाइनान्सियल टाइम्सले इरानी सेनाले चिनियाँ जासुसी उपग्रह प्रयोग गरेर अमेरिकी सैन्य ठेगानाहरूको निगरानी र आक्रमण गरेको दाबी गरेपछि यो विवाद थप जटिल बनेको छ। ट्रम्पले यदि चीनले इरानलाई हतियार सहयोग गरिरहेको पुष्टि भएमा त्यो चीनका लागि ठूलो समस्या बन्ने चेतावनी समेत दिनुभएको छ।