बैशाख २३, काठमाडौं । भारतको तामिलनाडु राज्यमा हालै सम्पन्न विधानसभा निर्वाचनमा तमिल सिनेमाका चर्चित सुपरस्टार जोसेफ विजयको नवगठित राजनीतिक दल ‘तमिलगा भेट्ट्री कझगम’ (टिभिके) ले ऐतिहासिक सफलता हासिल गरेको छ। पहिलो पटक चुनावी मैदानमा ओर्लिएको विजयको पार्टीले कुल २३४ सिटमध्ये १०८ सिटमा शानदार जित दर्ता गर्दै राज्यकै सबैभन्दा ठूलो दल बन्न सफल भएको हो। २३४ सदस्यीय विधानसभामा बहुमतका लागि ११८ सिट आवश्यक पर्ने भए पनि टिभिके स्पष्ट बहुमतभन्दा केवल १० सिटले मात्र पछि परेको छ। पार्टी अध्यक्ष विजय आफैँले पेराम्बुर र तिरुची इस्ट गरि दुईवटा निर्वाचन क्षेत्र बाट चुनाव जितेका कारण उनले नियमानुसार एउटा सिट त्याग्नुपर्नेछ, जसले गर्दा तत्कालका लागि पार्टीको सिट संख्या १०७ मा कायम हुने देखिन्छ। बहुमतको जादुई आँकडा सुनिश्चित गर्नका लागि विजयको दलले साना पार्टी तथा स्वतन्त्र विधायकहरूसँग गठबन्धनका लागि संवाद अगाडि बढाइसकेको भारतीय सञ्चारमाध्यमहरूले जनाएका छन्। यसैबीच, ५ सिट जितेको भारतीय राष्ट्रिय कंग्रेसले ‘साम्प्रदायिक शक्तिहरूलाई सत्ता बाहिर राख्ने’ सर्तमा विजयको पार्टीलाई समर्थन गर्ने औपचारिक घोषणा गरिसकेकाले टिभिकेको पक्षमा ११२ सिट पुग्ने देखिएको छ भने बाँकी सिटका लागि डिएमकेका पूर्वसहयोगी दलहरू सिपिआई र सिपिएम लगायतसँग पनि छलफल भइरहेको छ।
​विगत पाँच दशकदेखि डिएमके र एआइएडिएमके को दुई दलीय वर्चस्व रहेको तामिलनाडुको राजनीतिमा विजयको यो उदयलाई राजनीतिक विश्लेषकहरूले ऐतिहासिक परिवर्तनका रूपमा लिएका छन्। यसपटकको चुनावमा वर्तमान मुख्यमन्त्री एम.के. स्टालिनको पार्टी डिएमके नेतृत्वको गठबन्धन ७४ सिट र प्रतिपक्षी एआइएडिएमके नेतृत्वको मोर्चा ५२ सिटमा खुम्चिएका छन् भने मुख्यमन्त्री स्टालिनले पराजय बेहोर्दै पदबाट राजीनामा समेत दिइसकेका छन्। चुनावी परिणाम सार्वजनिक भएलगत्तै विजयले चेन्नईमा नवनिर्वाचित विधायकहरूसँग विशेष बैठक गर्दै संसदीय दलको नेता चयन र सरकार गठनको रणनीतिबारे सघन छलफल सुरु गरेका छन्। करिब ३५ प्रतिशत लोकप्रिय मतसहित उदय भएको टिभिकेको यो जितले तमिल राजनीतिमा सिनेमाका पुराना महानायक एमजी रामचन्द्रको ऐतिहासिक बिरासतलाई ब्युँताएको चर्चा भइरहेको छ, जसका कारण सुपरस्टार विजय तामिलनाडुको नयाँ मुख्यमन्त्री बन्ने सम्भावना निकै बलियो बनेको छ।