जेठ २४,काठमाण्डाै। भारतका केन्द्रीय शिक्षामन्त्री धर्मेन्द्र प्रधानको राजीनामा माग गर्दै ‘कक्रोच जनता पार्टी’ (सिजेपी) ले राजधानी नयाँ दिल्लीस्थित जन्तर मन्तरमा पहिलो पटक सडक प्रदर्शन गरेको छ। पार्टीका संस्थापक अभिजित दिप्केको नेतृत्वमा शनिबार बिहानैदेखि सयौँको संख्यामा उपस्थित युवाहरूले मन्त्रालयमाथि गम्भीर प्रश्न उठाउँदै नाराबाजी गरेका हुन्। विशेषगरी सन् २०२६ को प्रश्नपत्र चुहावट प्रकरण र कक्षा १२ को उत्तरपुस्तिका परीक्षणमा प्रयोग गरिएको सिबिएसईको ‘अनस्क्रिन मार्किङ’ प्रणालीमा भएको भनिएको अनियमितता नै आन्दोलनको मुख्य कारण बनेको हाे।

प्रदर्शनमा लद्दाखका चर्चित अभियन्ता सोनम वाङ्चुकको समेत ऐक्यबद्धता रहेको छ। चार दशकदेखि दुर्गम भेगका सरकारी विद्यालय सुधारमा क्रियाशील वाङ्चुकले शिक्षा क्षेत्रको बेथिति र अपेक्षित परिवर्तन नहुँदा बढेको निराशाले आफूलाई सडकमा आउन बाध्य पारेको बताउनुभयाे। सिजेपीका संस्थापक दिप्केले शिक्षामन्त्री प्रधानलाई राजीनामा दिन शनिबार साँझ ५ बजेसम्मको अन्तिम समयसीमा (अल्टिमेटम) दिनुभएकाे छ। उक्त समयभित्र माग सम्बोधन नभए प्रदर्शनलाई देशभरि विस्तार गर्ने चेतावनी उहाँले दिनुभएकाे छ।

व्यंग्यात्मक अभियानका रूपमा सुरु भएको सिजेपी पछिल्लो समय युवाहरू माझ बलियो राजनीतिक शक्ति बन्दै गएको छ। अदालतको एक टिप्पणीलाई आधार बनाएर खडा भएको यस समूहको भारतका ठूला राजनीतिक दलहरूभन्दा पनि धेरै २ करोड २० लाखभन्दा बढी इन्स्टाग्राममा फलोअर्स रहेको दाबी गरिएको हो। पार्टीका संस्थापक ३० वर्षीय अभिजित दिप्के महाराष्ट्रका हुनुहुन्छ। उहाँले बोस्टन विश्वविद्यालयबाट पब्लिक रिलेसनमा स्नातकोत्तर गर्नुभएकाे छ भने सन् २०२० देखि २०२३ सम्म आम आदमी पार्टीमा रही सामाजिक सञ्जाल व्यवस्थापन र चुनावी अभियानमा काम गरेको अनुभव बटुल्नुभएकाे छ।