जेठ ३१, काठमाडौँ । फिफा विश्वकप २०२६ अन्तर्गत समूह ‘सी’ को खेलमा स्कटल्यान्डले विजयी शुरूआत गरेको छ । रोमान्चक प्रतिस्पर्धामा स्कटल्यान्डले उत्तर अमेरिकी राष्ट्र हैटीलाई १–० गोल अन्तरले पराजित गरेको हो । स्कटल्यान्डका लागि खेलको २९ औँ मिनेटमा जोन म्याकगिनले गरेको गोल नै निर्णायक बन्यो । खेलभरि ५४ प्रतिशत बल आफ्नो नियन्त्रणमा राखे पनि हैटीले गोल फर्काउन सकेन । यो जितसँगै ३ अङ्क जोड्दै स्कटल्यान्ड समूहको शीर्ष स्थानमा उक्लिएको छ भने यसअघि भएको यसै समूहको पहिलो खेलमा ब्राजिल र मोरक्कोले १–१ गोलको बराबरी खेल्दै अङ्क बाँडेका थिए ।

सन् १९७४ को जर्मनी विश्वकपपछि ५२ वर्षको लामो अन्तरालमा विश्वमञ्चमा फर्किएको हैटीको यो दोस्रो विश्वकप सहभागिता हो । आफ्नै महादेशमा भइरहेको यस प्रतियोगितामा हैटी विगतको खराब इतिहास सुधार्ने लक्ष्यमा छ । कोनकाकाफ छनोटका १० मध्ये ६ खेल जित्दै र नोभेम्बरमा कोस्टा रिका तथा निकारागुवालाई हराउँदै हैटीले विश्वकप यात्रा तय गरेको थियो । ४८ राष्ट्रमध्ये फिफा वरीयतामा पुछारबाट दोस्रो स्थानमा रहेको हैटीले विश्वकपअघि न्युजिल्यान्डमाथि ४–० को जित निकालेको थियो ।

सन् १९९८ पछि अर्थात् २८ वर्षपछि विश्वकपमा फर्किएको स्कटल्यान्डको यो नवौँ सहभागिता हो । यूईएफए छनोटका ६ मध्ये ४ खेल जितेको स्कटल्यान्डलाई यसपालि प्रतियोगिताको ‘डार्क हर्स’ का रूपमा हेरिएको छ । स्कट म्याकटोमिने र एन्डी रोबर्टसन जस्ता विश्वचर्चित खेलाडीहरू रहेको स्कटल्यान्डले विश्वकपअघि कोरासाओलाई ४–१ र बोलिभियालाई ४–० ले हराउँदै सानदार तयारी गरेको थियो । इतिहासमा अहिलेसम्म समूह चरण पार गर्न नसकेको स्कटल्यान्डका लागि यसपटक बलियो प्रदर्शन गर्दै पहिलोपटक नकआउट चरणमा पुग्ने सुवर्ण अवसर रहेको छ ।