जेठ ३१, काठमाण्डाै । ब्राजिलको साओ पाउलोस्थित ‘स्केलेटन ब्रिज’मा बन्जी जम्पिङ गराउने आयोजकको चरम लापरबाहीका कारण २१ वर्षीया मारिया एडुआर्डा रोड्रिग्स डी फ्रेटासको ज्यान गएको छ। एक निजी कम्पनीले सञ्चालन गरेको उक्त साहसिक खेलका क्रममा सुरक्षा डोरी (सेफ्टी रोप) नबाँधी युवतीलाई १३० फिटभन्दा बढी उचाइबाट हाम फाल्न लगाइएको थियो।

सामाजिक सञ्जालमा सार्वजनिक भएको हृदयविदारक भिडियोमा कर्मचारीहरूले युवतीलाई पुलको किनारमा लगेर हाम फाल्न लगाएको र उनी खसेपछि मात्र सुरक्षा डोरी नभएको थाहा पाएर मानिसहरू ‘रोप-रोप’ भन्दै चिच्याएको देखिन्छ। मारियाले दुर्घटना हुनु केही समयअघि मात्रै आफ्नो सामाजिक सञ्जालमा जम्पिङ रिस्टब्यान्डसहितको तस्बिर पोस्ट गर्दै ठट्टामा लेखेकी थिइन्, ‘आखिर कुन पागल मानिसले मलाई पुलबाट हाम फाल्न आउन दियो?’

घटनास्थलमा मारियाका हुनेवाला पति पनि उपस्थित थिए, जसको प्रेमिकाको मृत्युको खबरले स्वास्थ्य अवस्था बिग्रिएपछि उपचार भइरहेको छ। घटनालगत्तै प्रहरीले अनुसन्धान सुरु गर्दै जिम्मेवार ६ जना कर्मचारीलाई नियन्त्रणमा लिएको छ। बन्जी जम्पिङ जस्तो संवेदनशील खेलमा सुरक्षा मापदण्ड नअपनाउँदा एक होनहार युवतीले ज्यान गुमाउनुपरेको भन्दै स्थानीय स्तरमा आक्रोश बढेको छ।