असार ७, काठमाडौँ । मध्यपूर्वमा जारी युद्धको स्थायी अन्त्य गर्ने उद्देश्यका साथ संयुक्त राज्य अमेरिका र इरानबीच स्विट्जरल्याण्डमा निर्णायक वार्ता सुरु भएको छ । मध्यस्थकर्ता राष्ट्र कतारको विदेश मन्त्रालयले आइतबार एक विज्ञप्ति जारी गर्दै दुई देशबीच औपचारिक संवाद सुरु भएको पुष्टि गरेको हो । स्विट्जरल्याण्डको बुरगेनस्टक रिसोर्टमा ‘लेक लुसर्न समिट’ को ब्यानरमा उच्च–स्तरीय समितिको पहिलो बैठक प्रारम्भ भएको कतारी अधिकारीहरूले जनाउनुभएकाे छ ।

विगत केही समयदेखि अशान्त बनेको मध्यपूर्वको भूगोलमा दीर्घकालीन शान्ति स्थापना गर्ने रणनीतिका साथ यो बैठक आयोजना गरिएको हो । बैठकमा मुख्य पक्षहरू अमेरिका र इस्लामिक गणतन्त्र इरानसहित मध्यस्थकर्ताको भूमिकामा रहेका कतार र पाकिस्तानका उच्च प्रतिनिधिहरूको सहभागिता रहेको छ । गत हप्ताको बिहीबार अमेरिका र इरानबीच हस्ताक्षर भएको ‘समझदारी पत्र’ मा टेकेर यो वार्ता अगाडि बढेको हो । कतारको विदेश मन्त्रालयले आगामी बैठकहरूले उक्त समझदारी पत्रमा उल्लेखित सबै संवेदनशील पक्षहरूलाई सम्बोधन गर्दै एक व्यापक र स्थायी शान्ति सम्झौताको मार्ग प्रशस्त गर्ने विश्वास व्यक्त गरेको छ ।

यस ऐतिहासिक शान्ति प्रक्रियामा दक्षिण एसियाली मुलुक पाकिस्तानले पनि महत्त्वपूर्ण मध्यस्थकर्ताको भूमिका निर्वाह गरिरहेको छ । वार्तामा सहभागी हुन पाकिस्तानका प्रधानमन्त्री शेहबाज शरिफ र सेना प्रमुख फिल्ड मार्शल सैयद असिम मुनीर उच्च–स्तरीय प्रतिनिधिमण्डलसहित स्विट्जरल्याण्ड पुगिसक्नुभएकाे छ । इरानी प्रतिनिधिमण्डल शनिबार राति नै जेनेभा अवतरण गरिसकेको छ भने अमेरिकी टोलीको नेतृत्व गर्दै उपराष्ट्रपति जेडी भान्स पनि युरोप पुगेर वार्तामा सक्रिय भइसक्नुभएकाे छ । यस वार्ताले विश्व राजनीति र खस्कँदो विश्व अर्थतन्त्रलाई स्थिर बनाउन ठूलो सघाउ पुर्‍याउने अपेक्षा अन्तर्राष्ट्रिय कूटनीतिज्ञहरूले गर्नुभएकाे छ ।