असार ९, काठमाण्डाै । फिफा विश्वकप-२०२६ अन्तर्गत समूह चरणको रोमाञ्चक खेलमा फ्रान्सले इराकविरुद्ध ३-० को सानदार जित दर्ता गरेको छ। अमेरिकाको फिलाडेल्फिया रंगशालामा सोमबार सम्पन्न उक्त खेलमा फ्रान्सका कप्तान किलियन एम्बाप्पेले दुई गोल गर्दै टोलीलाई नकआउट चरणमा पुर्‍याउन महत्त्वपूर्ण भूमिका खेल्नुभएकाे हाे।

वर्षाका कारण खेल झण्डै १ घण्टा स्थगित भए पनि पुनः सुरु भएपछि फ्रान्सेली खेलाडीहरू निकै आक्रामक रूपमा प्रस्तुत भए। खेलको १४औँ मिनेटमा एम्बाप्पेले पहिलो गोल गर्दै टोलीलाई सुरुवाती अग्रता दिलाउनुभएकाे थियाे। पहिलो हाफमा १-० को अग्रता बनाएको फ्रान्सका लागि ५४औँ मिनेटमा एम्बाप्पेले पुनः गोल गर्दै आफ्नो व्यक्तिगत खातामा दोस्रो गोल थप्नुभयाे।

खेलको ६६औँ मिनेटमा उस्मान डेम्बेलेले तेस्रो गोल गर्दै फ्रान्सको जित सुनिश्चित गर्नुभयाे। आफ्नो फुटबल करियरमा विश्वकपमा डेम्बेलेले गरेको यो पहिलो गोल हो। यसअघि इराक आफ्नो पहिलो खेलमा नर्वेसँग ४-१ गोल अन्तरले पराजित भएको थियो, भने फ्रान्सले सेनेगललाई ३-१ ले हराएको थियो।

लगातार दुई जितसँगै फ्रान्स समूहबाट एक खेल अगावै नकआउट चरणमा प्रवेश गरेको छ। लगातार दोस्रो हारसँगै इराकको अघिल्लो चरण प्रवेशको सम्भावना न्यून बनेको छ।