असार १०, काठमाडौँ । संयुक्त राष्ट्रसङ्घको एउटा छानबिन आयोगले इजरेलले गाजा क्षेत्रमा प्यालेस्टिनी बालबालिकालाई जानीजानी निसाना बनाएको र त्यसो गर्दा त्यहाँ नरसंहार, मानवताविरुद्धका अपराध र युद्धअपराध भएको निष्कर्ष निकालेको छ । आयोगको नयाँ प्रतिवेदनमा इजरेली निकाय र सुरक्षाबलहरूले लाखौँ प्यालेस्टिनी बालबालिकाको मृत्यु हुने तथा गम्भीर शारीरिक र मानसिक क्षति पुग्ने कार्यहरू योजनाबद्ध रूपमा गरेको आरोप लगाउँदै इजरेलकै अधीनमा रहेको वेस्ट ब्याङ्कमा पनि युद्धअपराध भएको उल्लेख गरिएको छ ।

गत अक्टोबरको युद्धविरामपछि पनि हत्याको शृङ्खला जारी रहेको औँल्याउँदै प्रतिवेदनले यस्ता कार्यहरू बालबालिकालाई लक्षित गरेर गाजास्थित प्यालेस्टिनीहरूको भविष्य नष्ट गर्ने रणनीति अन्तर्गत गरिएको दाबी गरेको छ । इजरेलको विदेश मन्त्रालयले यस प्रतिवेदनलाई पूर्ण रूपमा अस्वीकार गर्दै यसलाई “अपमानजनक झुट” र “प्रचारबाजी”को सङ्ज्ञा दिएको छ । सन् २०२३ अक्टोबर ७ मा हमासको नेतृत्वमा दक्षिणी इजरेलमा भएको अप्रत्याशित आक्रमणमा झन्डै १,२०० जनाको मृत्यु भएपछि र २५१ जनालाई बन्धक बनाएपछि इजरेली सेनाले गाजामा सैन्य कारबाही थालेको थियो । त्यसयता इजरेली आक्रमणमा गाजामा कम्तीमा ७३,०३५ जनाको ज्यान गइसकेको छ, जसमा २१,२८० भन्दा बढी बालबालिका रहेका छन् भने संयुक्त राष्ट्रसङ्घले हमासद्वारा सञ्चालित स्वास्थ्य मन्त्रालयको यस विवरणलाई विश्वसनीय मानेको छ ।