असार १८, काठमाडाैँ । चीनको जियाङ्सू प्रान्तस्थित वुशी सहरमा एक रेस्टुरेन्ट सञ्चालकले संकटमा परेका बेरोजगार युवकलाई भोजनसँगै रोजगारीको अवसर दिएर मानवताको दुर्लभ उदाहरण प्रस्तुत गरेका छन्। रोजगारी गुमेपछि र थाती रहेको पारिश्रमिकसमेत नपाएर चरम आर्थिक अभावमा गुज्रिरहेका ‘वान’ थरका युवकले दिनमा एक छाक मात्र खाएर गुजारा गर्दै आएका थिए।

यस्तै बाध्यतामा उनले एक अनलाइन फूड डेलिभरी एपमार्फत १२.८ युआनको फ्राइड राइस अर्डर गर्दै रेस्टुरेन्टलाई आफ्नो नाजुक आर्थिक अवस्थाबारे जानकारी गराउँदै अलिकति बढी भात पठाइदिन भावुक अनुरोध गरेका थिए। युवकको पीडाप्रति सहानुभूति दर्शाउँदै रेस्टुरेन्ट सञ्चालक ‘ट्यान’ले अर्डरभन्दा निकै बढी परिमाणमा भोजन पठाउनुका साथै उनलाई आफ्नो रेस्टुरेन्टमा प्रशिक्षार्थी कामदार (अप्रेंटिस) का रूपमा आबद्ध हुन लिखित निमन्त्रणा नै पठाए।

सञ्चालकको उक्त सहृदयी अफर स्वीकार गर्दै वानले हाल त्यहाँ काम थालिसकेका छन्। आफूले पाएको सहयोग र अवसरको कथा समेटिएको भिडियो वानले सामाजिक सञ्जालमा सार्वजनिक गरेपछि उक्त सामग्री अहिले विश्वभर भाइरल बनेको छ। ४ करोडभन्दा बढी पटक हेरिएको सो भिडियोमा विश्वभरका प्रयोगकर्ताले संकटको घडीमा भोजनसँगै आत्मनिर्भर बन्ने अवसर प्रदान गर्ने सञ्चालक ट्यानको उदारताको मुक्तकण्ठले प्रशंसा गरेका छन्।