असार १९, काठमाडाैँ । थाइल्याण्डको उत्तर-पूर्वी प्रान्त मुक्दाहानमा भएको दर्दनाक सडक दुर्घटनामा परी मृत्यु हुने बौद्ध भिक्षुहरूको संख्या १० पुगेको छ। धार्मिक पैदल यात्रा (तीर्थयात्रा) मा रहेका ३४ जना भिक्षुहरूको समूहलाई एक ११ वर्षीय बालकले तीव्र गतिमा पिकअप ट्रकले ठक्कर दिँदा उक्त त्रासदीपूर्ण घटना घटेको हो। स्थानीय प्रशासनका अनुसार उपचारका क्रममा थप एक भिक्षुको निधन भएपछि मृतकको संख्या दुई अंकमा पुगेको हो।

बालकले अभिभावकको अनुमति बिनै घरको ‘इसुजु’ पिकअप ट्रक लिएर सडकमा निस्किएको अनुसन्धानबाट खुलेको छ। गाडी चोरी भएको थाहा पाउनासाथ बालककी आमाले तत्कालै प्रहरीको ‘१९१’ आपतकालीन नम्बरमा फोन गरी गाडी नियन्त्रणमा लिन आग्रह गरेकी थिइन्। प्रहरीले सडकमा गाडी फेला पार्नुअघि नै उक्त बालकले नियन्त्रण गुमाएर भिक्षुहरूको समूहलाई ठक्कर दिइसकेका थिए।

यस घटनाले थाइल्याण्डमा ठूलो आश्चर्य र बहस जन्माएको छ। दुर्घटनाग्रस्त पिकअप ट्रक ‘अटोमेटिक’ नभई ‘म्यानुअल ट्रान्समिसन’को थियो। यति सानो उमेरको बालकले क्लच र गियरको जटिल प्रयोग गर्दै १० किलोमिटरभन्दा बढी दूरी गाडी चलाउनुले उनलाई कसैले यसअघि नै सवारी चलाउन सिकाएको वा तालिम दिएको हुनसक्ने बलियो आशंका उत्पन्न भएको छ।

श्रोतका अनुसार बालक अहिले गम्भीर मानसिक आघात (शक) मा रहेकाले प्रहरीले बयान लिन सकेको छैन। थाइल्याण्डको कानुनअनुसार नाबालिगसँग जोडिएको मुद्दा भएकाले बाल अधिकार विज्ञ, मनोविद् र सरकारी वकिलसहितको ‘मल्टिडिसिप्लिनरी’ टोलीको उपस्थितिमा मात्रै सोधपुछ प्रक्रिया अघि बढ्नेछ। साथै, दुर्घटनाग्रस्त गाडीको प्राविधिक परीक्षण (फरेन्सिक टेस्ट) भइरहेको छ।

प्रहरीले घटनालाई गम्भीरतापूर्वक लिँदै १५ वर्षमुनिका बालकलाई सवारी साधनमा पहुँच दिएको र रेखदेखमा लापरबाही गरेको अभियोगमा अभिभावकमाथि समेत कडा कानुनी कारबाही गर्ने विषयमा परामर्श थालेको छ। कमजोर सडक सुरक्षा रेकर्डका लागि आलोचित थाइल्याण्डमा घटेको यस हृदयविदारक घटनाले अभिभावकीय जिम्मेवारी र सवारी सुरक्षाका विषयमा राष्ट्रव्यापी बहस छेडेको छ।