असार २०, काठमाडाैँ । साविक विजेता अर्जेन्टिना फिफा विश्वकप २०२६ को नकआउट चरणमा डेब्यु टोली केप भर्डविरुद्ध निकै संघर्षपूर्ण जित निकाल्दै अन्तिम १६ मा प्रवेश गरेको छ। शुक्रबार राति मायामी स्टेडियममा भएको रोमाञ्चक खेलमा अर्जेन्टिनाले केप भर्डलाई ३–२ गोलले पराजित गरेको हो।

विश्वकपको इतिहासमै सम्भवत: सबैभन्दा ठूलो उलटफेरको संघारमा पुगेको अर्जेन्टिना अन्तिम समयको आत्मघाती गोलको मद्दतले मात्र प्रतियोगितामा आफ्नो यात्रा कायम राख्न सफल भयो। खेलको १११औं मिनेटमा केप भर्डका डिनी बोर्जेसले गरेको आत्मघाती गोल अर्जेन्टिनाको भाग्यको ढोका खोल्न पर्याप्त बन्यो।

खेलको २९औं मिनेटमा कप्तान लिओनल मेसीले गोल गर्दै अर्जेन्टिनालाई सुरुवाती अग्रता दिलाएका थिए। यो मेसीको विश्वकप करियरको २०औं गोल थियो। फिफा वरीयतामा ६४औं स्थानमा रहेको केप भर्डले कडा प्रतिवाद गर्‍यो। दोस्रो हाफमा डेरोय दुआर्टेले गोल फर्काउँदै खेललाई १–१ को बराबरीमा ल्याए।

निर्धारित ९० मिनेटसम्म १–१ को बराबरीमा सकिएपछि खेल अतिरिक्त समयमा धकेलिएको थियो। अतिरिक्त समयको ९२औं मिनेटमा लिसान्ड्रो मार्टिनेजले अर्जेन्टिनाका लागि गोल गर्दै अग्रता दिलाए पनि केप भर्डले हार मानेन। १०३औं मिनेटमा सिड्नी लोप्स काब्रालले विश्वकप इतिहासकै उत्कृष्ट मध्येको एक गोल गर्दै खेल २–२ को बराबरीमा पुर्‍याएका थिए।

१११औं मिनेटमा बोर्जेसको दुर्भाग्यपूर्ण आत्मघाती गोलले अर्जेन्टिनालाई ३–२ को कठिन जित दिलायो। पराजयका बाबजुद केप भर्डले आफ्नो साहस, सीप र वीरताले फुटबल प्रेमीहरूको मन जित्न सफल भएको छ।