असार २०, काठमाडाैँ । भारतको उत्तराखण्ड राज्यस्थित उधमसिंह नगरको नानकमत्ता क्षेत्रमा भएको सवारी दुर्घटनामा परी दुई नेपाली युवकको ज्यान गएको छ।

बिडोरा–मझोला मार्गमा शुक्रबार तीव्र गतिमा रहेको भारतीय कारले मोटरसाइकललाई ठक्कर दिँदा कञ्चनपुरका दुई युवाको घटनास्थलमै मृत्यु भएको हो। ज्यान गुमाउनेमा कञ्चनपुरको दोधारा चाँदनी नगरपालिका–८ का राहुल चदारो र वडा नम्बर ९ का कमल खड्का रहेका छन्।

श्रोतका अनुसार, दिल्लीबाट मोटरसाइकलमा घर फर्किरहेका उनीहरूलाई विपरीत दिशाबाट आइरहेको कारले ठक्कर दिएको थियो। दुर्घटनालगत्तै गम्भीर घाइते अवस्थामा रहेका दुवैजनालाई उपचारका लागि सामुदायिक स्वास्थ्य केन्द्र, सितारगंज लगिएको थियो। तर, स्वास्थ्य केन्द्र पुर्‍याउनासाथ चिकित्सकले दुवैलाई मृत घोषित गरेका थिए।

हाल मृतकहरूको शव पोस्टमार्टमका लागि सोही अस्पतालमा राखिएको छ। घटनाबारे जानकारी पाएलगत्तै मृतकका परिवार र आफन्तहरू शव बुझ्नका लागि आज शनिबार भारत प्रस्थान गरेका छन्।

बिषेश श्रोतका अनुसार, कानुनी प्रक्रिया र पोस्टमार्टम सकेर आजै शवलाई नेपाल ल्याउने तयारी भइरहेको छ। विदेशको बाटोमा ज्यान गुमाउने दुई युवाको असामयिक निधनले सिंगो कञ्चनपुरमा शोक छाएको छ।