असार २५, काठमाडौँ । फिफा विश्वकप २०२६ को अन्तिम १६ को रोमाञ्चक खेलमा अर्जेन्टिनासँग ३-२ ले पराजित भएपछि इजिप्टले गम्भीर विवाद खडा गरेको छ। रेफ्रीको विवादास्पद निर्णयका कारण आफूहरूले हार बेहोर्नुपरेको दाबी गर्दै इजिप्ट फुटबल संघले फिफासमक्ष औपचारिक उजुरी दर्ता गराएको छ।

इजिप्टले खेल सञ्चालन गरेका फ्रान्सेली रेफ्री फ्रान्कोइस लेटेक्सियर र उनको टोलीले ‘दोहोरो मापदण्ड’ अपनाएको आरोप लगाएको छ। मुख्य दुई विवादित घटनाहरूमा इजिप्ट १-० ले अग्रता लिइरहेका बेला भीएआरको सहयोगमा मोस्ताफा जिकोको गोल रद्द गरिनु र खेलको अन्त्यतिर मोहम्मद सलाहलाई पेनाल्टी क्षेत्रमा लडाउँदा फाउल नदिनुलाई संघले ‘इजिप्टविरुद्धको अपराध’ भनेको छ।

इजिप्टका प्रशिक्षक होसाम हसनले आफुहरुमाथि योजनाबद्ध अन्याय भएको र विश्वविजेता अर्जेन्टिना र मेस्सीलाई प्रतियोगितामा टिकाइराख्न रेफ्रीले भूमिका खेलेको बताएका छन्। त्यस्तै, खेलाडी मोस्ताफा जिकोले यो खेल ‘फिक्स’ भएको कडा टिप्पणी गरेका छन्।

यता, फुटबल विज्ञहरू भने इजिप्टको उजुरीले नतिजा बदलिने सम्भावना न्यून रहेको बताउँछन्। सन् २०२२ को विश्वकपमा फ्रान्सको उजुरी खारेज भएको उदाहरण दिँदै उनीहरूले रेफ्रीको निर्णयलाई नै अन्तिम मानिने स्पष्ट पारेका छन्। विवादका बाबजुद अर्जेन्टिना अब क्वार्टरफाइनलमा स्विट्जरल्याण्डविरुद्ध खेल्ने तयारीमा जुटेको छ।