असार २९, काठमाडौँ । लेन्दे खोलामा आएको लेदोसहितको बाढीका कारण १११ मेगावाट क्षमताको रसुवागढी जलविद्युत् आयोजनाबाट हुने विद्युत् उत्पादन आइतबार साँझदेखि ठप्प भएको छ। बाढीले संरचनामा क्षति पुर्‍याउन सक्ने जोखिमलाई मध्यनजर गर्दै आयोजना व्यवस्थापनले आकस्मिक रूपमा उत्पादन बन्द गरेको हो।

आयोजना प्रमुखका अनुसार, सुरक्षा सावधानी अपनाउँदै टनेलमा पानी पठाउने ‘इन्टेक गेट’हरू बन्द गरिएको छ। नदीको बहाव सामान्य हुनासाथ आज (सोमबार) नै उत्पादन पुनः सुचारु गर्ने तयारी रहेको श्रोतले जनाएको छ। गत वर्षको असारमा आएको विनाशकारी बाढीले यस आयोजनाको ड्याम तथा भौतिक संरचनामा पुर्‍याएको क्षतिबाट पाठ सिक्दै यसपटक आयोजनाले उच्च सतर्कता अपनाएको हो।

यसैबीच, भोटेकोसी नदीमा पानीको सतह बढेसँगै रसुवागढी भन्सार यार्डमा पार्किङ गरिएका कार्गो ट्रक र आयातित सवारी साधनहरूलाई सुरक्षाकर्मीले सुरक्षित स्थानमा सारेका छन्। बाढीले यार्डको उत्तरी क्षेत्रसमेत जोखिममा परेको भन्दै चालकहरूले तटबन्धको माग गरेका छन्।

आइतबारको बाढीले मैलुङ सडक खण्डमा असर पुर्‍याएपछि जिल्ला प्रशासन कार्यालय, रसुवाले जोखिमयुक्त सडकको यात्रा नगर्न आग्रह गरेको छ। प्रमुख जिल्ला अधिकारीले केरुङ आवतजावत गर्ने सवारी साधनहरूलाई वैकल्पिक मार्गका रूपमा बेत्रावती–कालिकास्थान–धुन्चे–स्याफ्रुबेसी–रसुवागढी सडक प्रयोग गर्न सूचना जारी गर्नुभएकाे छ।

गोसाइँकुण्ड गाउँपालिकाले खोला आसपासमा नजान र नदी किनारमा सवारी साधन पार्किङ नगर्न स्थानीयवासीलाई सचेत गराएकाे छ। निरन्तरको वर्षासँगै नदीमा पानीको सतह बढ्न सक्ने भएकाले सार्वजनिक स्थानहरूमा समेत सावधानी अपनाउन प्रशासनले अपिल गरेको छ। कुनै पनि आकस्मिक विपद्को खबर गर्न सर्वसाधारणलाई टोल-फ्री नम्बर १२३४ मा सम्पर्क गर्न अनुरोध गरिएको छ।

अहिलेसम्म मैलुङ सडक खण्ड प्रभावित हुनुबाहेक अन्य ठूलो मानवीय वा भौतिक क्षति नभएको प्रशासनले जनाएको छ।