श्रावन ४, काठमाडौँ । स्पेनले सन् २०२६ को फिफा विश्वकपको उपाधि उचालेको छ। न्युजर्सीस्थित मेटलाइफ स्टेडियममा सम्पन्न रोमाञ्चक फाइनल खेलमा साविक विजेता अर्जेन्टिनालाई अतिरिक्त समयमा १-० गोलले पराजित गर्दै स्पेन दोस्रो पटक विश्व च्याम्पियन बनेको हो। यसअघि स्पेनले सन् २०१० मा पहिलो पटक विश्वकप जितेको थियो।

खेलको निर्धारित ९० मिनेटसम्म दुवै टोलीबाट गोल हुन नसकेपछि खेल अतिरिक्त समयमा धकेलिएको थियो। अतिरिक्त समयको १०६औँ मिनेटमा वैकल्पिक खेलाडीका रूपमा मैदान छिरेका फेरान टोरेसले निर्णायक गोल गर्दै स्पेनलाई ऐतिहासिक जित दिलाए।

खेलको अन्त्यतिर अर्जेन्टिनाका मिडफिल्डर एन्जो फर्नान्डेजले दोस्रो पहेँलो कार्डसहित रातो कार्ड पाएपछि अर्जेन्टिना १० खेलाडीमा सीमित बन्न पुग्यो। एक खेलाडी कम भएको फाइदा उठाउँदै स्पेनले खेलमा पूर्ण नियन्त्रण जमायो।

यस हारसँगै ३९ वर्षीय लिओनल मेसीको लगातार दोस्रो पटक विश्वकप जित्ने सपना चकनाचुर भएको छ। खेलभरि स्पेनको कडा रक्षापंक्ति र रणनीतिक दबाबका कारण मेसीले खुलाडीका रूपमा खासै प्रभाव पार्न सकेनन्।

प्रतियोगिताभरि उत्कृष्ट रक्षापंक्ति र सन्तुलित खेल प्रदर्शन गरेको स्पेनले स्टार खेलाडीमा मात्र भर नपरी अनुशासित ‘टिम वर्क’ का आधारमा १६ वर्षपछि फेरि एकपटक विश्व फुटबलको सर्वोच्च शिखर चुम्न सफल भएको छ।