श्रावण २८, काठमाडौँ । ऊर्जा, जलस्रोत तथा सिँचाइ मन्त्री विराजभक्त श्रेष्ठले आफ्नो मन्त्रालयका लागि चार सदस्यीय सल्लाहकार समूह तयार पार्नुभएको छ। बिहीबार तीन जना नयाँ अनुहार थपेसँगै सल्लाहकारहरूको संख्या चारमा पुगेको हो।

मन्त्रालयका जानकारी अनुसार, योजना तथा लगानी क्षेत्र हेर्नका लागि आशुतोष तिवारी, नीति क्षेत्रका लागि रमेश पौडेल र निजी क्षेत्र सम्बन्धी विषयका लागि गणेश कार्कीलाई जिम्मेवारी दिइएको छ। यसअघि नै विवेकराज कँडेललाई ऊर्जा सल्लाहकारका रूपमा नियुक्त गरिसकिएको थियो।

यसरी हेर्दा अहिले मन्त्री श्रेष्ठको टोलीमा ऊर्जा, नीति, योजना-लगानी र निजी क्षेत्र गरी चार फरक-फरक क्षेत्रका विज्ञहरू समावेश भएको उहाँको सचिवालयले जनाएको छ। नवनियुक्त सल्लाहकार कार्की स्वतन्त्र ऊर्जा उत्पादकहरूको संस्था नेपाल (इपान) को निवर्तमान अध्यक्षसमेत रहनुभएको छ।

मन्त्रालयका अनुसार यी सल्लाहकारहरूले आ-आफ्नो क्षेत्रसँग सम्बन्धित नीति निर्माण, योजना तर्जुमा, लगानी प्रवर्द्धन र निजी क्षेत्रसँगको समन्वय जस्ता विषयमा मन्त्रीलाई आवश्यक सुझाव तथा परामर्श दिनुहुनेछ। साथै, सबै सल्लाहकारले यो जिम्मेवारी अवैतनिक रूपमा निर्वाह गर्ने मन्त्रालयले स्पष्ट पारेको छ।